జ్ఞాపకశక్తికి 'మధ్యధరా' డైట్.. సూపర్‌ఫుడ్స్ కంటే ఇదే మేలు!

మెదడు ఆరోగ్యాన్ని కాపాడుకోవడానికి, జ్ఞాపకశక్తిని పెంచుకోవడానికి ఏవో కొన్ని 'సూపర్‌ఫుడ్స్' మీద ఆధారపడటం కన్నా సమగ్రమైన ఆహార పద్ధతిని పాటించడం ఎంతో మేలని ప్రముఖ న్యూరాలజిస్ట్ డాక్టర్ సుధీర్ కుమార్ తెలిపారు. హైదరాబాద్‌లోని అపోలో హాస్పిటల్స్‌లో సీనియర్ న్యూరాలజిస్ట్‌గా పనిచేస్తున్న ఆయన, ముఖ్యంగా 'మధ్యధరా ఆహారం' (Mediterranean Diet) దీర్ఘకాలంలో మెదడుకు ఎన్నో ప్రయోజనాలు చేకూరుస్తుందని స్పష్టం చేశారు. ఈ మేరకు 'ఎకనామిక్ టైమ్స్' ఓ కథనం వెలువరించింది.

మధ్యధరా ఆహార పద్ధతిని పాటించడం వల్ల మెదడు పనితీరు మెరుగుపడటంతో పాటు, డిమెన్షియా (మతిమరుపు వ్యాధి) ముప్పు కూడా తగ్గుతుందని శాస్త్రీయ ఆధారాలు ఉన్నాయని ఆయన వివరించారు. ఈ డైట్‌లో పండ్లు, కూరగాయలు, తృణధాన్యాలు, చేపలు, పప్పులు, ఆలివ్ ఆయిల్, నట్స్ వంటివి ఎక్కువగా ఉంటాయి. ఈ ఆహారం తీసుకోవడం వల్ల స్ట్రోక్ ప్రమాదం తగ్గడం, వయసు పెరిగేకొద్దీ మెదడు చురుకుదనం తగ్గకుండా చూడటం వంటి ప్రయోజనాలు కలుగుతాయని డాక్టర్ సుధీర్ పేర్కొన్నారు.

మెదడుకు నిరంతరం శక్తి అవసరమని, రక్తంలో చక్కెర స్థాయిలను స్థిరంగా ఉంచే ఆహారాలు దీనికి ఎంతగానో దోహదపడతాయని ఆయన అన్నారు. భోజనంలో సగం పండ్లు, కూరగాయలు ఉండేలా చూసుకోవాలని సూచించారు. వీటితో పాటు తృణధాన్యాలు, చేపలు లేదా పప్పులు, ఆలివ్ ఆయిల్, గుప్పెడు నట్స్ తీసుకోవడం మంచిదని తెలిపారు. మితంగా కాఫీ, డార్క్ చాక్లెట్ తీసుకోవడం వల్ల కూడా కొన్ని ప్రయోజనాలు ఉంటాయని నిపుణులు చెబుతున్నారు.

అయితే, ఆహారపు అలవాట్లలో పెద్ద మార్పులు చేసుకునే ముందు వైద్యులను లేదా ఆరోగ్య నిపుణులను సంప్రదించడం చాలా ముఖ్యమని ఆయన సూచించారు.